Thumbnail

დრამატული ფინალი ბათუმში - ქუთაისის ტორპედო საქართველოს თასის მფლობელია!

ლაშა წიკლაური პროფილის ფოტო
ლაშა წიკლაური
  • გაგრამ ორბურთიანი უპირატესობა გაუშვა ხელიდან
  • ტორპედომ ფინალი პენალტების სერიაში მოიგო

საქართველოს დავით ყიფიანის თასი ქუთაისის ტორპედომ მოიპოვა. კახა ჩხეტიანის გუნდმა დრამატულ ფინალურ შეხვედრაში გაგრას მოუგო. ეროვნული ლიგა 2-ის წარმომადგენელი ორი ბურთის სხვაობით იგებდა, თუმცა ტორპედომ გაათანაბრა ანგარიში და შემდეგ, თერთმეტმეტრიანების სერიაში გაიმარჯვა.

მატჩის 37-ე წუთი მიმდინარეობდა, როდესაც რატი ცაცკრიალაშვილის შესანიშნავი გადაცემის შემდეგ, ნუგზარ სპენდერაშვილი მეკარესთან პირისპირ დარჩა და გახსნა ანგაიში, 1:0. მეორე ნახევარი ხუთი წუთის დაწყებულიც არ იყო, როდესაც გაგრამ მეორე გოლი გაიტანა და სოლიდური უპირატესობა მოიპოვა. კუთხურის შემდეგ, თავური დარტყმით ვაკო ხაბეიშვილი გამოირჩა, 2:0.

ტორპედო - გაგრას თამაში დაძაბული და დრამატული გამოდგა

დარჩენილ დროში ტირპედო გააქტიურდა, რაც მოსალოდნელი იყო. ქუთაისელებმა გარისკეს, დიდი ძალებით შეუტიეს და დაუფასდათ კიდეც. 75-ე წუთი მიმდინარეობდა, როდესაც კუთხურის შემდეგ, თავური დარტყმით მილოშ ლაჩნიმ გაიტანა და მინიმუმამდე შეამცირა ტორპედოს ჩამორჩენა.

მატჩის ძირითადი დროის დასრულებამდე ერთი წუთი იყო დარჩენილი, როდესაც გაგრას მცველს საჯარიმოში ბურთი ხელზე მოხვდა და მსაჯმა თერთმეტმეტრიანი დანიშნა. ბურთთან მილოშ ლაჩნი მივიდა, დუბლი შეასრულა და გაათანაბრა ანგარიში, 2:2.

დამატებით დროში უფრო ქუთაისური გუნდი აქტიურობდა, თუმცა პირველი ტაიმის მიწურულს მსაჯმა დავით ხურცილავა გააძევა მოედნიდან და ტორპედო კაცნაკლული დარჩა. შესაბამისად, გაგრას კარზე წნეხი შესუსტდა და საქმე თერთმეტმეტრიანების სერიამდე მივიდა.

საქართველოს თასის განახლებული დიზაინი

ფოტოები სფფ-ს FB გვერდიდან

ისევე როგორც მთელი შეხვედრა, თერთმეტმეტრიანების სერიაც დრამატული გამოდგა. ქუთაისელებმა ოთხი დარტყმა ზუსტად შეასრულეს, გაგრამ კი ორი პენალტი გააფუჭა. ჯერ ჯაბა კასრელიშვილმა ააცილა ბურთი კარს, ბოლოს კი ერეკლე სულთანიშვილს აუღო როინ კვასხვაძემ. აღსანიშნავია, რომ სულთანიშვილმა პირველი მცდელობით გაიტანა გოლი, თუმცა მსაჯმა ჩათვალა, რომ ერეკლემ გამორბენის დროს პაუზა გააკეთა და მას ხელმეორედ დაარტყმევინა, რამაც ტორპედოს სასიკეთოდ გადაწყვიტა მატჩის ბედი. შედეგად, კახა ჩხეტიანის გუნდი საქართველოს თასის მფლობელია! 

გაგრა 2:2 ტორპედო

პენალტების სერია: 2:4

გოლები: 1:0 სპენდერაშვილი (37), 2:0 ხაბეიშვილი (49), 2:1 ლაჩნი (75), 2:2 ლაჩნი (89).

გაგრა: შევჩუკი, კილაძე, სამხარაძე, კაკიაშვილი, გაფრინდაშვილი, ხოსიტაშვილი, სულთანიშვილი, ცაცკრიალაშვილი, ხაბეშვილი, გაფრინდაშვილი, სპენდერაშვილი.

ტორპედო: კვასხვაძე, კობახიძე, ხურცილავა, ქიმაძე, გეგეჭკორი, აზაცკი, დოლიძე, კუტალია, გიგაური, ცინცაძე, კაპანაძე.

"ტორპედო" საქართველოს თასს მეოთხედ დაეუფლა. 🖤

"ტორპედო" საქართველოს თასს მეოთხედ დაეუფლა. 🖤

Posted by F.C. Torpedo Kutaisi on კვირა, 25 ნოემბერი, 2018

კომენტარები

ბოლო ამბები