- ესპანეთის ნაკრებმა ამხანაგურ მატჩში ბოსნია-ჰერცოგოვინას მოუგო
- ლუის ენრიკე აცხადებს, რომ ერთა ლიგაში ერთ-ერთი რთული ჯგუფი შეხვდა
- ესპანეთის ფეხბურთის ფედერაცია მწვრთნელს სრულ მხარდაჭერას უცხადებს
ესპანეთის ნაკრებმა, რომელმაც უეფას ერთა ლიგაში გამოსვლა ცოტა ხნის წინ წარუმატებლად დაასრულა, ამხანაგური მატჩი ბოსნია-ჰერცოგოვინის ნაკრებთან გამართა. ლას პალმას დე გრან კანარიაში გამართული შეხვედრა მასპინძლებმა მინიმალური ანგარიშით, სელტას ნახევარმცველის ბრაის მენდესის მიერ 78-ე წუთზე გატანილი გოლით მოიგეს.
შეგახსენებთ, რომ ესპანეთის ნაკრებმა უეფას ერთა ლიგაში, A დივიზიონის მეოთხე ჯგუფში გამოსვლა 6 ქულით, მეორე ადგილზე დაასრულა. ტურნირის პლეი ოფში თამაშის უფლება ამ ჯგუფში ინგლისმა (7 ქულა) მოიპოვა, B ლიგაში კი ხორვატია (4) დაქვეითდა.
ბოსნია-ჰერცოგოვინასთან ამხანაგური მატჩის შემდეგ, ესპანეთის ნაკრების მთავარმა მწვრთნელმა ლუის ენრიკემ გუნდის ერთა ლიგაში გამოსვლაც შეაფასა:
"მინდა გავამახვილო ყურადღება იმაზე, რომ ტურნირში ერთ-ერთი ყველაზე რთული ჯგუფი გვერგო. სტარტზე მოპოვებული ორი მოგების შემდეგ, ყველას გვეგონა, რომ ფინალურ სტადიაზე გავიდოდით, მაგრამ ესეთია ფეხბურთი - უიღბლობლამ და გარკვეული შეცდომებმა წინ წასვლის საშუალება არ მოგვცა. ახლა მთელი ყურადღება ევროპის ჩემპიონატის საკვალიფიკაციო ეტაპს უნდა დავუთმოთ და ვფიქრობ, რომ ჩვენი ნაკრები კარგად გამოიყურება".
48 წლის ენრიკემ, რომელიც ესპანეთის ნაკრებს სათავეში უეფას ერთა ლიგის დაწყებამდე ჩაუდგა, პირველი მიზანი ვერ შეასრულა, თუმცა, ქვეყნის ფეხბურთის ფედერაციის პრეზიდენტმა ლუის რუბიალესმა მხარდაჭერა მაინც გამოუცხადა:
"რა თქმა უნდა, ფინალურ სტადიაზე გასვლა გაგვახარებდა, მაგრამ უარეს შემთხვევაში, შევძელით და A ლიგაში ადგილი მაინც შევინარჩუნეთ. უნდა გავითვალისწინოთ ისიც, რომ გუნდში გარდაქმნის პროცესი მიმდინარეობს - ბევრი ახალგაზრდა მოთამაშეა. ნაბიჯ-ნაბიჯ ვაგრძელებთ წინსვლას და გვჯერა ნაკრების ფეხბურთელებს.
ფედერაცია აბსოლუტურად დარწმუნებულია იმაში, რომ ნაკრებს ამ მწვრთნელთან ერთად შეუძლია წარმატების მიღწევა. ჩვენ კმაყოფილი ვართ მისი საქმიანობით და მაქსიმალურად ვუჭერთ მხარს", - აქვეყნებს რუბიალესის ნათქვამს Football Espana.
კომენტარები