- ევროპის 2025 წლის ჩემპიონატს ლატვია, ფინეთი და კვიპროსი უმასპინძლებენ
- მეოთხე მასპინძელი უკრაინა იქნება, თუკი ქვეყანაში ვითარება გამოსწორდება
- ლატვია ტურნირის ერთ-ერთი ჯგუფის გარდა, ფინალურ ეტაპსაც მიიღებს
- მოუსმინე: სტატიის აუდიო ვერსია
ფიბა-ევროპამ კალათბურთში ევროპის 2025 წლის ჩემპიონატის სამ მასპინძელთან დაკავშირებით საბოლოო გადაწყვეტილება მიიღო, მეოთხეს ვინაობას კი მოგვიანებით დააზუსტებს.
ევრობასკეტი 2025-ის ჯგუფური ეტაპები ლატვიაში, ფინეთსა და კვიპროსში გაიმართება, მეოთხე მასპინძელი კი, სავარაუდოდ, უკრაინა იქნება. ლატვიაში ჩატარდება ტურნირის დასკვნითი, ფინალური ეტაპიც.
აღსანიშნავია, რომ ევროპის რიგით 42-ე ჩემპიონატის მასპინძლობაზე განაცხადი შეტანილი ლატვიას, უნგრეთს, რუსეთსა და უკრაინას ჰქონდათ, როგორც ჯგუფურ, ისე ფინალურ ეტაპზე. კვიპროსისა და ფინეთის განაცხადები კი მხოლოდ ჯგუფური ეტაპის მიღებას ითვალისწინებდა.
ცოტა ხნის წინ უნგრეთმა თავისი კანდიდატურა მოხსნა, რუსეთის განაცხადის ანულირების მიზეზი კი ამ ქვეყნის მიერ უკრაინაში ომის დაწყება გახდა.
რაც შეეხება უკრაინას, FIBA-ს საბჭო ამ ქვეყანასთან ევრობასკეტის ოთხიდან ერთი ჯგუფის მასპინძლობაზე მოლაპარაკებებს ნოემბრამდე გააგრძელებს. თუკი ქვეყანაში ვითარება დამშვიდდება, ტურნირის მეოთხე მასპინძელი სწორედ უკრაინა იქნება, თუმცა ფიბა-ევროპა პარალელურად, სათადარიგო ვარიანტზეც იმუშავებს.
შეგახსენებთ, რომ კალათბურთში ევროპის 41-ე ჩემპიონატი, რომლის ერთ-ერთი მასპინძელი საქართველოა, შარშან უნდა გამართულიყო, მაგრამ კორონავირუსის პანდემიის გამო, ტურნირი ერთი წლით გადავადდა.
კომენტარები