- მილუოკი ბაქსი 123:92 ორლანდო მეჯიქი
- ჩემპიონმა ტაიმი 41 ქულით მოიგო, რაც ახალი რეკორდია
- გოგა ბითაძის 0/5 - დაღლილი ჩიკაგო ბულსი ინდიანასთან ჩაიძირა
სრული კრახი! ორლანდო მეჯიქის თამაშს მილუოკიში სხვას ვერაფერს დავარქმევთ.
მოქმედმა ჩემპიონმა სტუმრები დაუნდობლად გაანადგურა და პირველსავე ტაიმში საკუთარი რეკორდი გააუმჯობესა: ბაქსმა ტაიმი 41-ქულიანი (!) უპირატესობით მოიგო (77:36).
პირველ მეოთხედში 15:0 გაქცევამ კარგად აჩვენა, რა მიმართულებით წავიდოდა ეს თამაში და ამის შემდეგ მილუოკიმ გაზიდან ფეხი აღარც აიღო. ჯრუ ჰოლიდეის ლიდერობით (18 ქულა 23 წუთში) მასპინძლებმა ძალიან სწრაფად შეძლეს გადამწყვეტი უპირატესობის მოპოვება - ისე, რომ იანის ანტეტოკუნმპომ ძალების დაზოგვა შეძლო (12 ქულა, 9 პასი და 8 მოხსნა 24 წუთში).
დომინანტური სტარტის შემდეგ, მეორე პერიოდში უპირატესობა 44 ქულამდეც კი გაიზარდა, მეორე ტაიმში კი 51-მდე. ამრიგად, მილუოკი პირველი გუნდია ამ სეზონში, რომელმაც თამაშში მინიმუმ 50-ქულიან უპირატესობას მიაღწია. სტარტერებთან ერთად ეს კარგად მოთამაშე რეზერვისტების დამსახურებაცაა - მაგალითად, კონოტონის (17 ქულა), ან ნვორასი (14). მოკლედ, მილუოკიმ ორლანდო (სროლების პროცენტი: 36,6) აწამა.
მოქმედ ჩემპიონს, რომლის რიგებში სანდრო მამუკელაშვილს კვლავ არ უთამაშია, 18 მატჩის შემდეგ 10 მოგება და 8 მარცხი აქვს. ბაქსი ამ შედეგით აღმოსავლეთ კონფერენციაში მე-8 ადგილზეა. ორლანდო კი 4 გამარჯვებითა და 14 მარცხით კონფერენციის აუტსაიდერია.
კომენტარები