- Forbes-მა ყველაზე მაღალი შემოსავლების მქონე სპორტსმენთა სია გამოაქვეყნა
- ბოლო 12 თვეში ყველაზე მეტი მაკგრეგორმა, მესიმ და რონალდომ გამოიმუშავეს
- ტოპათეულის ჯამური შემოსავალი შარშანდელთან შედარებით გაზრდილია
შერეული ორთაბრძოლების ირლანდიელი მებრძოლი კონორ მაკგრეგორი მსოფლიოს ყველაზე მაღალშემოსავლიანი სპორტსმენია. რეიტინგი ამერიკულმა ჟურნალმა Forbes-მა გამოაქვეყნა.
32 წლის ირლანდიელი სპორტსმენის შემოსავალმა ბოლო ერთ წელიწადში 180 მილიონი დოლარი შეადგინა. მაკგრეგორმა ამ თანხის დიდი ნაწილი ვისკის საკუთარი ბრენდის საკონტროლო წილის გაყიდვიდან ($150 მლნ) მიიღო. კიდევ 8 მილიონი მან სარეკლამო კონტრაქტებიდან გამოიმუშავა, უშუალოდ ოქტაგონზე ჩატარებული ბრძოლებიდან კი კონორის შემოსავალი $22 მილიონი იყო.
მაკგრეგორი Forbes-ის რეიტინგში მანამდე სულ ერთხელ იყო წარმოდგენილი - 2018 წელს, როდესაც $99 მილიონით მეოთხე ადგილი დაიკავა.
ყველაზე მაღალშემოსავლიანი სპორტსმენების წლევანდელი რეიტინგის ტოპსამეულში ასევე მოხვდნენ ბარსელონას კაპიტანი ლიონელ მესი და ტურინის იუვენტუსის თავდამსხმელი კრიშტიანო რონალდო. არგენტინელმა ფეხბურთელმა ბოლო ერთ წელიწადში $130 მილიონი გამოიმუშავა, საიდანაც $97 მლნ კლუბში მიიღო, კიდევ $33 მლნ კი სარეკლამო კონტრაქტებიდან.
იუვენტუსის პორტუგალიელი ფორვარდის შემოსავალი $120 მილიონია, საიდანაც თითქმის ნახევარი ($50) სარეკლამო და სხვა, არასაფეხბურთო სფეროში საქმიანობამ მოუტანა. იუვენტუსთან გაფორმებული კონტრაქტით გათვალისწინებული შემოსავლების გარდა, კრიშტიანო თანამშრომლობს ბრენდ Nike-თან, ასევე ფლობს საკუთარ, ტანსაცმლის, აქსესუარების, სასტუმროებისა და სატრენაჟორო დარბაზების ბიზნეს.
მსოფლიოს TOP 10 მაღალანაზღაურებადი სპორტსმენი
1. კონორ მაკგრეგორი (შერეული ორთაბრძოლები) - $180 მლნ.
2. ლიონელ მესი (ფეხბურთი) - $130 მლნ.
3. კრიშტიანო რონალდო (ფეხბურთი) - $120 მლნ.
4. დაკ პრესკოტა (ამერიკული ფეხბურთი) - $100 მლნ.
5. ლებრონ ჯეიმსი (კალათბურთი) - $96,5 მლნ.
6. ნეიმარი (ფეხბურთი) - $95 მლნ.
7. როჯერ ფედერერი (ჩოგბურთი) - $90 მლნ.
8. ლუის ჰემილტონი (ფორმულა 1) - $82 მლნ.
9. ტომ ბრედი (ამერიკული ფეხბურთი) - $76 მლნ.
10. კევინ დურანტი (კალათბურთი) - $75 მლნ.
აღსანიშნავია, რომ მსოფლიოს 2021 წლის 10 ყველაზე მაღალანაზღაურებადი სპორტსმენის ჯამური შემოსავალი $1,05 მილიარდს შეადგენს, რაც 28%-ით მეტია შარშანდელი ტოპათეულის შემოსავალზე.
კომენტარები