Thumbnail

საქართველოს მორაგბეთა ეროვნული ნაკრების სამწვრთნელო შტაბმა 20 მარტს რუსეთთან გასამართი მატჩისთვის 23-კაციანი შემადგენლობა დაასახელა. ამ ინფორმაციას საქართველოს რაგბის კავშირი ავრცელებს.

“ესპანეთთან მატჩის შემდეგ, შემადგენლობაში დიდი როტაცია არ გაგვიკეთებია. ჯერ კიდევ ტურნირის დაწყებამდე, ტრავმის გამო რამდენიმე მოთამაშე გამოგვაკლდა. სამწუხაროდ, ვერ გამოჯანმრთელდა ბექა საღინაძე. ასევე დაგვაკლდება ვასილ ლობჟანიძე, რომლის გამოცდილება ფასდაუდებელია. ტრავმირებულია დემე თაფლაძეც. ამ ფონზე ფაქტობრივად დიდი არჩევანი არც გვქონდა და არსებული რესურსით, მაქსიმალურად ოპტიმალური შემადგენლობა დავაყენეთ. გუნდში მრავლად არიან ახალგაზრდა მორაგბეები, რომლებმაც ეს ტვირთი უნდა იტვირთონ. ბევრი მათგანისთვის ესაა შანსი, რომელსაც გამოყენება უნდა და არაერთი მაგალითი გვაქვს იმისა, რომ ასეთ ფონზე დაწინაურებულ მოთამაშეს, ძირითადში დაუმკვიდრებია ადგილი. გუნდის შემართება მაღალ დონეზეა და მათი შესაძლებლობები სწორედ ასეთ მატჩებში გამოიცდება“ – განაცხადა ნაკრების მთავარმა მწვრთნელმა ლევან მაისაშვილმა.

ესპანეთთან მატჩის შემდეგ, შერკინების ხაზში სამი ცვლილებაა. წლევანდელ რაგბი ევროპაზე პირველ თამაშს ატარებს და ძირითადშია კვაჭი გიორგი ჭყოიძე. ბექა გიგაშვილმა ადგილი შეინარჩუნა და ამჯერად მას გიორგი მელიქიძე შეუწყვილდება. მეორე ხაზის წყვილი უცვლელი დარჩა – ლაშა ჯაიანი და დავით გიგაური. მესამე ხაზში ძირითადში დაწინაურდა გიორგი თხილაიშვილი, ახალბედა ირაკლი ცხადაძემ კი მარქაფაში გადაინაცვლა. მეორე ფლანკერის პოზიციაზე კვლავ – მიხეილ გაჩეჩილაძეს, ხოლო შერკინების შემკვრელად თორნიკე ჯალაღონიას ვიხილავთ. კვაჭის მარქაფაშია ჯაბა ბრეგვაძე, ხოლო ბურჯების პოზიციაზე შეცვლაზე გურამ გოგიჩაშვილი და გია ხარაიშვილი შემოვლენ. მეორე ხაზში ნოდარ ჭეიშვილს ვიხილავთ.

“პირველ ხაზში, ტაქტიკური მონახაზიდან გამომდინარე, მუდმივად მივმართავთ როტაციას. ჭყოიძე რუსეთთან მატჩში (თებერვალში) შეცვლაზე ეფექტურად შემოვიდა. ის კარგია როგორც შეტევაში, ასევე დაცვაში და ლოგიკურია, რომ მატჩის დაწყება მას ვანდეთ, შეცვლაზე კი გამოცდილი ჯაბა ბრეგვაძე გვყავს. მეორე ხაზი უცვლელად დავტოვეთ. გიგაურმა წინა თამაში კარგად ჩაატარა და ჯაიანს კვლავ ის შევუწყვილეთ. მესამე ხაზში თხილაიშვილი დაწინაურდა, რომელიც უფრო გამოცდილია და ამ ეტაპზე არჩევანი მასზე შევაჩერეთ“ – ამბობს შერკინებასთან დაკავშირებით მაისაშვილი.

რაგბი ევროპა | #ბორჯღალოსნების შემადგენლობა რუსეთის წინააღდეგ დასახელდა 🏉 ➡️ გაიგე მეტი აქ: http://bit.ly/3eY7n9v 🇷🇺...

Posted by Georgian Rugby on Thursday, March 18, 2021


წინა თამაშის შემდეგ, ერთი იძულებითი ცვლილებაა ხაზში. ესპანეთში, მატჩის დებიუტში დაშავდა დემე თაფლაძე და მის ნაცვლად მოედანზე სანდრო თოდუა შევიდა, რომელიც ახლა ძირითადშია. მარქაფაში გამოჩნდა სოსო მათიაშვილი, ხოლო სასტარტოში კვლავ ახალგაზრდა დავით ნინიაშვილია.

“ნინიაშვილი კარგია საჰაერო ორთაბრძოლებისას და ფეხით თამაშისას. მას აქვს პატარ-პატარა შეცდომები, მაგრამ ამ ბიჭმა დაგვანახა, რომ მისთვის წნეხი უცხო არაა და ასეთ თამაშებში კიდევ უფრო გაიზრდება. გადაზღვევის მიზნით შეცვლაზეა გამოცდილი მათიაშვილი. კვლავ მარქაფაშია გიორგი ბაბუნაშვილი. სამწუხაროდ, წინა შეხვედრები ისე წარიმართა, მისი თამაშში ჩართვა ვერ მოხერხდა, თუმცა ის ძალიან ბევრს მუშაობს, ელოდება შანსს და ეს დასაფასებელია“.

“ბორჯღალოსნები” კალინინგრადში 30-კაციანი შემადგენლობით მიფრინავენ და იქ მათ ორი ლეგიონერი – ილია სპანდერაშვილი და ნიკო აფციაური შეუერთდებიან. საქმე ისაა, რომ თამაშის წინა დღეს გუნდს Covid 19-ზე სწრაფი ტესტები ჩაუტარდება და სამი, ან ნაკლები დადებითი პასუხის შემთხვევაში მატჩი შედგება. სწორედ ამიტომ, გუნდს ყველა პოზიციაზე თითო სარეზერვო მოთამაშე ყავს:

“ახალი რეგულაციებით კვირაში 2-3-ჯერ ვიტესტებით. მატჩის წინა დღეს სწრაფი ტესტი გვიწევს და ყოველი შემთხვევისთვის, ყველა პოზიციაზე თითო სარეზერვო მოთამაშე მიგვყავს. მესამე ხაზში არჩევანი ფაქტობრივად არ გვქონდა. სპანდერაშვილი და აფციაური რუსეთში არიან და მათ არ მოუწევთ ვიზის ლოდინი. ორივე მათგანი კარგ ფიზიკურ ფორმაშია და ვიცით მათი შესაძლებლობები. ისინი გუნდთან ერთად იქნებიან და პრობლემის შექმნის შემთხვევაში დაგვაზღვევენ. ნაკრებთან ერთად ყოფნა მათთვისაც კარგია“.

საქართველოს ნაკრები რუსეთთან

ხაზი: 15. დავით ნინიაშვილი (4 კეპი), 14. აკაკი ტაბუცაძე (9 კეპი, 35 ქულა), 13. გიორგი კვესელაძე (31 კეპი, 25 ქულა), 12. მერაბ შარიქაძე (74 კეპი, 60 ქულა), 11. სანდრო თოდუა (91 კეპი, 65 ქულა), 10. თედო აბჟანდაძე (22 კეპი, 139 ქულა), 9. გელა აფრასიძე (32 კეპი, 24 ქულა);

შერკინება: 1. ბექა გიგაშვილი (21 კეპი, 5 ქულა), 2. გიორგი ჭყოიძე (14 კეპი, 5 ქულა), 3. გიორგი მელიქიძე (25 კეპი, 15 ქულა), 4. ლაშა ჯაიანი (9 კეპი), 5. დავით გიგაური (9 კეპი, 5 ქულა), 6. მიხეილ გაჩეჩილაძე (14 კეპი, 10 ქულა), 7. გიორგი თხილაიშვილი (63 კეპი, 60 ქულა), 8. თორნიკე ჯალაღონია (7 კეპი, 10 ქულა);

სათადარიგოები: 16. ჯაბა ბრეგვაძე (64 კეპი, 25 ქულა), 17. გურამ გოგიჩაშვილი (20 კეპი, 5 ქულა), 18. გია ხარაიშვილი (2 კეპი), 19. ნოდარ ჭეიშვილი (28 კეპი), 20. ირაკლი ცხადაძე (2 კეპი); 21. მიხეილ ალანია (3 კეპი), 22. გიორგი ბაბუნაშვილი (უკეპო), 23. სოსო მათიაშვილი (31 კეპი, 156 ქულა).

კომენტარები

ბოლო ამბები