Thumbnail

ძმები არველაძეები თურქეთის და უზბეკეთის პრეზიდენტებმა დააფასეს

ლაშა წიკლაური პროფილის ფოტო
ლაშა წიკლაური
  • რეჯეფ თაიფ ერდოღანმა შოთა და არჩილ არველაძეები სცენაზე იხმო
  • საინტერესო ამბავი უზბეკეთიდან

თურქეთის პრეზიდენტი რეჯებ თაიფ ერდოღანი უზბეკეთში იმყოფებოდა სამუშაო ვიზიტით, რომლის ფარგლებში უზბეკეთის პრეზიდენტ შავკატ მირზიოევთან ერთად საგანგებო შეხვედრა გამართა პოლიტიკოსებთან, ბიზნესმენებთან და სხვადასხვა სფეროს წარმომადგენლებთან. 

შეხვედრაზე შოთა და არჩილ არველაძეებიც იმყოფებოდნენ, რომლებმაც საფეხბურთო კარიერის საწყისი წლები თურქეთში გაატარეს და ტრაბზონსფორის ისტორიაში დიდი კვალი დატოვეს. შოთა არველაძე თურქეთში მწვრთნელადაც მუშაობდა, დღეს კი ძმასთან ერთად ტაშკენტის ფახთაქორს უდგას სათავეში.

თურქეთის და უზბეკეთის პრეზიდენტები სხვადასხვა სფეროში მოღვაწე წარმატებულ ადამიანებს ხვდებოდნენ, დანარჩენი კი თავად შოთა არველაძისგან მოვისმინოთ…

“თურქეთის რესპუბლიკის პრეზიდენტი რეჯეფ თაიფ ერდოღანი, ოფიციალური ვიზიტით უზბეკეთში იმყოფება. დღეს იგი ტაშკენტში, ქვეყნის პრეზიდენტ შავკატ მირზიოევთან ერთად ბიზნესმენებს, პოლიტიკოსებსა და სხვადასხვა სფეროს წარმომადგენლებს შეხვდა. შეხვედრაზე მე და აჩიც ვიმყოფებოდით. მოულოდნელად, ეკონომიკის განვითარებისა და ქვეყნებს შორის არსებულ ურთიერთობებზე საუბრის დროს, ერდოღანმა ჩემზე და აჩიზე დაიწყო ლაპარაკი, შემდეგ სცენაზე ასვლა გვთხოვა.

"უზბეკეთში ბევრი სასიკეთო ინვესტიციის განხორციელებას ვაპირებთ, რომელიც ბევრ სხვადასხვა სფეროს შეეხება. ეს არ იქნება მხოლოდ ეკონომიკური მიმართულება, ინვესტიცია მოიცავს განათლებას და კულტურასაც. ამავდროულად, აქ არიან შოთა და არჩილი, რომლებიც ჩვენთან, თურქეთში წლების მანძილზე მოღვაწეობდნენ და ახლა, გუნდს უზბეკეთში წვრთნიან. ეს შესანიშნავი კომბინაციაა" - რეჯეფ თაიფ ერდოღანი. 

მინდა მადლობა გადავუხადო თურქეთის რესპუბლიკის პრეზიდენტს, რომელიც ყოველთვის გამოირჩეოდა ჩვენს მიმართ გულთბილი დამოკიდებულებით. ასევე, უზბეკეთის პრეზიდენტ შავკატ მირზიოევს თბილი შეხვედრისთვის. ჩვენთვის დიდი პატივია, ასეთ მასშტაბურ ფორუმზე მათთან შეხვედრა, რისთვისაც ორივე მხარეს, კიდევ ერთხელ ვუხდით დიდ მადლობას”.    

კომენტარები

ბოლო ამბები