- ინდიანა პეისერსი 129:114 ტორონტო რეპტორსი
- გოგა ბითაძემ 12 წუთში 10 ქულა დააგროვა
- ისევ სამმაგი დუბლი! დონჩიჩი ჯორდანს გაუთანაბრდა, დალასი მაინც აგებს
გოგა ბითაძეს NBA-ს რეგულარულ სეზონში 10 ან მეტი ქულა ერთ თამაშში აქამდე მხოლოდ სამჯერ ჰქონდა დაფიქსირებული და აი, ეს უკვე მეოთხედ გააკეთა!
ინდიანას ქართველი ცენტრი ტორონტო რეპტორსთან სოლიდურად, 129:114 მოგებულ შეხვედრაში 11:57 წუთი ათამაშეს და თავიც გამოიჩინა - ბითაძემ 10 ქულა და 2 მოხსნა დააგროვა.
გოგამ ხუთიდან სამ 2-ქულიანი ჩააგდო და ოთხიდან ოთხივე საჯარიმო გამოიყენა. მან ერთხელ სამქულიანიც ისროლა, თუმცა არაზუსტად. ამრიგად, საჯარიმოების 100-პროცენტიანი შედეგი დააფიქსირა. მოხსნებიდან, ორივე დაცვაში ჰქონდა. გარდა ამისა, მის აქტივში 2 დაფარებაცაა. საბოლოოდ, +/- კოეფიციენტი -2 გამოუვიდა.
ის ფაქტი, რომ ბითაძე თითქმის 12 წუთი ათამაშეს, დომანტას საბონისის ტრავმის დამსახურებაა. ლიეტუველმა პარკეტზე მხოლოდ 10:48 წუთი გაატარა და ამ დროში 11 ქულა ჰქონდა. ინდიანადან საუკეთესო მალკოლმ ბროგდონი გახლდათ, რომელმაც 36 ქულას, 7 მოხსნას და 9 პასს მოუყარა თავი. მაილს ტერნერის ანგარიშზე კი ორმაგი დუბლია - 21 ქულით და 10 მოხსნით.
17 მატჩის შემდეგ, 10 მოგებით და 7 მარცხით ინდიანა აღმოსავლეთ კონფერენციაში მე-4 ადგილზეა. პეისერსი მომდევნო თამაშს 28 იანვარს, შარლოტთან გამართავს. ტორონტოსთან მატჩის საუკეთესო მომენტებს ვიდეოში ნახავთ.
კომენტარები