Thumbnail

IJF-მა გრიგალაშვილი მასტერსის საუკეთესო ძიუდოისტად დაასახელა

დათო მანჯავიძე პროფილის ფოტო
დათო მანჯავიძე

ძიუდოს საერთაშორისო ფედერაციამ (IJF) ყატარის დედაქალაქ დოჰაში დასრულებული მასტერსის საუკეთესო ვაჟ ძიუდოისტად საქართველოს ნაკრების ახალგაზრდა წევრი ტატო გრიგალაშვილი დაასახელა.

IJF-მა გადაწყვეტილების მიღებისას მხედველობაში მიიღო ძიუდოისტთა მიერ დაფიქსირებული შედეგი, იპონების რაოდენობა (არ ითვლებოდა ჰანსოკუ-მაკე, როდესაც გამარჯვებული ილეთის გარეშე, მსაჯების გადაწყვეტილებით ცხადდებოდა) და ტატამიზე გატარებული წუთები. გრიგალაშვილს დოჰაში 4 იპონი მოუგროვდა, ტატამიზე კი 16 წუთი და 33 წუთი დაჰყო. ქალთა შორის საუკეთესოდ საფრანგეთის ნაკრების წევრი რომეინ დიკო (4 იპონი, 9 წუთი და 3 წამი) აღიარეს.

ტატო გრიგალაშვილი კვარცხლბეკის უმაღლეს საფეხურზე

შეგახსენებთ, რომ 21 წლის გრიგალაშვილმა 2021 წლის მასტერსზე 5 ორთაბრძოლა ჩაატარა და გზიდან უნგრელი ატილა უნგვარი, იტალიელი ანტონიო ესპოზიტო, რუსი ალან ხუბეცოვი, სამხრეთკორეელი სუნგჰო ლი და ნიდერლანდელი ფრანკ დე ვიტი ჩამოიცილა.

საერთო ჯამში, საქართველოს ვაჟ ძიუდოისტთა ნაკრებმა დოჰას მასტერსზე 2 ოქროს, 1 ვერცხლისა და 2 ბრინჯაოს მედალი მოიპოვა და გუნდური მე-2 ადგილი დაიკავა. გრიგალაშვილის გარდა, ოქროს ვარლამ ლიპარტელიანი (100 კგ.) დაეუფლა, ვერცხლი ბექა ღვინიაშვილმა (90 კგ.) მოიპოვა, ბრინჯაოს მედლები კი ვაჟა მარგველაშვილმა (66 კგ.) და ლაშა ბექაურმა (90 კგ.) დაისაკუთრეს.

📺 გრიგალაშვილი V დე ვიტი

კომენტარები

ბოლო ამბები