- მომავალ წელს U17 და U20 მსოფლიოს ჩემპიონატები აღარ ჩატარდება
- 2021 წელს ტურნირები პერუსა და ინდონეზიაში უნდა ჩატარებულიყო
- ფიფამ ქალთა მუნდიალის ფინალური ეტაპი 32-გუნდიანი გახადა
ფიფამ თავის ოფიციალურ საიტზე გამოაცხადა, რომ მსოფლიოს 17 და 20-წლამდელთა მსოფლიოს ჩემპიონატები, რომლებიც 2021 წელს უნდა გამართულიყო, კორონავირუსის პანდემიის გამო გაუქმებულია.
ტურნირები პერუსა (17-წლამდელები) და ინდონეზიაში (20-წლამდელები) უნდა ჩატარებულიყო. ფიფას გადაწყვეტილებით, ეს ქვეყნები სანაცვლოდ, მსოფლიოს პირველობების მასპინძლების უფლებას 2023 წელს მიიღებენ.
20-წლამდელთა შორის მსოფლიოს მოქმედი ჩემპიონი უკრაინის ნაკრებია, რომლის შემადგენლობაში ამ ქვეყნის მოქალაქე გიორგი წიტაიშვილი გამოდიოდა. ფინალურ მატჩში, რომელშიც უკრაინელებმა სამხრეთ კორეას 3:1 მოუგეს, საბოლოო ანგარიში სწორედ წიტაიშვილმა დააფიქსირა.
17-წლამდე ასაკში მსოფლიოს მოქმედი ჩემპიონი ბრაზილიის ნაკრებია, რომელმაც 2019 წელს ტურნირი ისტორიაში მეოთხედ მოიგო.
ამას გარდა, ფიფამ გადაწყვეტილება მსოფლიოს ქალთა ჩემპიონატთან დაკავშირებითაც მიიღო - 2023 წლის ტურნირზე მონაწილე გუნდების რაოდენობა 32-მდე გაიზარდა.
კომენტარები