Thumbnail

'ვერ მიპასუხა და 2-ჯერ მესროლა' - ხარაზიშვილი დეტალებზე საუბრობს

ჯიმი ოლსენი პროფილის ფოტო
ჯიმი ოლსენი
  • რამაზ ხარაზიშვილმა დეტალურად ისაუბრა რაგბის კავშირში მომხდარ ინციდენტზე
  • იგი ამბობს, რომ კლანური დაჯგუფებები რაგბის უნდა ჩამოშორდნენ

16 სექტემბერს, საქართველოს რაგბის კავშირის შენობაში, საინიციატივო ჯგუფის ერთ-ერთი წევრი რამაზ ხარაზიშვილი დაჭრეს, რის გამოც მოგვიანებით კავშირის ვიცე-პრეზიდენტი მერაბ ბესელია დააკავეს. საინიციატივო ჯგუფის წევრთა აზრით, მომხდარი ქართულ რაგბში “კლანის” მოღვაწეობას უკავშირდება.

ხარაზიშვილის ოპერაციამ კარგად ჩაიარა. მას წოლითი რეჟიმი დაუნიშნეს. ხარაზიშვილმა ფეისბუქზე გამოქვეყნებულ პოსტში რაგბის კავშირში მომხდარი ინციდენტის დეტალები გაიხსენა და აღნიშნა, რომ კონფლიქტი მანამდე არცერთ წარმომადგენელთან არ ჰქონია. ხარაზიშვილი წუხს, რომ ნაკრები 8 ერისთვის სრულფასოვნად ვერ ემზადება და ყურადღება სხვა თემებზეა გადატანილი.

რამაზ ხარაზიშვილი: "გამარჯობა, ძალიან დიდი მადლობა ყველას მხარდაჭერისთვის და ყურადღებისთვის. ამჟამად კარგად ვარ, სახლში ვიმყოფები და წოლითი რეჟიმი დამინიშნეს. საბედნიეროდ, ძვალი არ არის დაზიანებული და ოპერაციამაც მარტივად ჩაიარა. ყველას, ვინც მომიკითხა და ყურადღება გამოიჩინა, კიდევ ერთხელ დიდ მადლობას ვუხდი. პირველ რიგში, მინდა აღვნიშნო, რომ ძალიან სამწუხარო ფაქტი მოხდა და ბოდიში მინდა მოვუხადო საზოგადოებას ამის გამო.

მიუხედავად იმისა, რომ მე პირადად არანაირი ბრალი არ მიმიძღვის გუშინდელ შემთხვევაში, გარედან მაინც ძალიან არასასიამოვნო შესახედია ეს ფაქტი ხალხისთვის, რაც აზიანებს აქამდე სიმწრითა და წვალებით მოტანილ სარაგბო რეპუტაციას. რაგბი, ისევე როგორც სხვა ნებისმიერი სპორტი, ეკუთვნის საზოგადოებას და სპორტსმენისთვის ყოველთვის უდიდესი პასუხისმგებლობაა, ღირსეულად წარმოადგენდეს ამა თუ იმ სახეობას.

რაც შეეხება გუშინდელ შემთხვევას: მოგეხსენებათ, ვარ კლუბების საინიციატივო ჯგუფის წევრი და კავშირის საკონსულტაციო საბჭოს წევრი, რომელიც სახლემწიფო მხარდაჭერით შეიქმნა (ბოლო დროს ძალიან ბევრი კარგი საქმე უკავშრდება ამ ჯგუფს და საბჭოს). გუშინ მივდიოდი რაგბის კავშირში სამუშაო შეხვედრაზე, სადაც უნდა მომხდარიყო განხილვა კოვიდსიტუაციასთან დაკავშირებით და კლუბები უნდა გაცნობოდნენ პროტოკოლებს ჩემპიონატის ჩატარებასთან დაკავშირებით, რა დროსაც კარებთან დამხვდა ნასვამი მერაბ ბესელია (რაგბის კავშირის ვიცე პრეზიდენტი), რომელიც ბოლო დროს საერთოდ ჩამოშორებულია საქმიანობას და არც მანამდე გამოირჩეოდა დიდი შრომისმოყვარებით.

მას და გამგეობის თავმჯდომარეს ჰქონდათ დაძაბული საუბარი, რა დროსაც დამიძახა, დამისვა სხვადასხვა პროვოკაციული კითხვა. იყო აგრესიული, როდესაც ჩემგან მიიღო ადეკვატური პასუხები და კონტრკითხვაზე პასუხი ვეღარ გამცა, ამოიღო იარაღი და მესროლა 2-ჯერ.

ამ დროს ხელში მეჭირა წყლის ბოთლი, ყავა და ვიყავი ზურგჩანთით. ამით იმის თქმა მინდა, რომ არანაირი დაპირისპირება და შეხლა-შემოხლა ჩვენ შორის არ ყოფილა, სანამ იარაღს ამოიღებდა და მესროდა. არც მანამდე მქონია მასთან დაპირისპირება და კავშირის არცერთ მოქმედ თუ ყოფილ ჩინოვნიკს არ დავპირისპირებივარ!!!

ერთადერთი, რასაც ვაკეთებდი ბოლო თვეების განმავლობაში იყო ის, რომ ვსაუბრობდი ფაქტებითა და ვსაუბრობდი სიმართლეს!

რაგბის სამყაროში დაპირისპირება არსებობს და ეს გუშინდელმა ფაქტმაც დაამტკიცა, მე და იმ ბიჭებს (საინიციატივო ჯგუფი და თითქმის ყველა ქართული კლუბის წარმომადგენელი), ვინც სიმართლეს ვლაპარაკობთ, ვერც იარაღით შეგვაშინებენ და ვერც სხვა რადიკალური ქმედებებით, მაგრამ საზოგადოების თვალში რეპუტაცია ნამდვილად გვეცლება და ჩვენი ყველაზე დიდი გულისტკივილი ამას შეეხება.

ეს უარყოფითად იმოქმედებს მომავალი თაობის რაგბით დაინტერესებაზე და აუცილებლად, სასწრაფოდ არის გამოსასწორებელი!

ყველასთვის ცნობილი და მარტივად გასაგები რომ გახდეს, რაგბის სამყარო ისევ ისეთია, როგორიც იყო და რითიც აქამდე ასე ვამაყობდით. უბრალოდ აქ არის ერთ მხარეს პატიოსანი და მშრომელი მოთამაშეები, მწვრთნელები და ის ხალხი, ვის მხრებზეც ყველაფერი გადადის, ხოლო მეორე მხარეს ჩინოვნიკების ჯგუფი - ადამიანები რომლებიც ბოლო 10 წელია მართავენ კავშირს. რაგბი ჩაძირეს და კრიზისამდე მიიყვანეს. ესეც არ აკმარეს და ახლა ჩირქს ცხებენ მსგავსი ქმედებებით და ხალხის თვალში უკარგავენ ყველანაირ პატივისცემას.

საბოლოოდ, არ მინდა რაიმე პოლიტიკური განცხადების გაკეთება, რადგან ჩემი ადგილი არის მოედანზე, მე ვარ მოქმედი მორაგბე და რომ არა ეს გაუსაძლისი პრობლემები, საერთოდ არ ჩავერთვებოდი ამ პროცესებში. ამიტომ, ჩემი პირველი ამოცანა დღეს მოედანზე დაბრუნებაა და ამას ძალიან მალე მოვახერხებ.

ასევე მინდა აღვნიშნო, რომ ჩვენი ყურადღება გადატანილი უნდა იყოს 8 ერის ტურნირისკენ, სადაც საქართველოს ნაკრები და მსოფლიოს უძლიერესი 7 ქვეყანა მიიღებს მონაწილეობას,რაც ერთ-ერთი ყველაზე დიდი გამოწვევაა ქართული რაგბის ისტორიაში. სამწუხაროდ, შიდა წინააღმდეგობების გამო ჩვენს მთავარ ამოცანას და მიზანს მოწყვეტილები ვართ და გვიწევს იმ კლანისგან შიშველი ხელებით თავის დაცვა, რომელიც წესით რაგბის განვითარებაზე უნდა ზრუნავდეს და არა თავიანთ კეთილდღეობაზე.

 

კომენტარები

ბოლო ამბები