- ჟურნალ Maxim-ის ექსკლუზიური ინტერვიუ შაკილ ო'ნილთან
- საჩემპიონო გოლდენ სტეიტი თუ შაკის და კობის ლეიკერსი?
ჟურნალმა Maxim-მა შაკილ ო'ნილთან ექსკლუზიური ინტერვიუ გამოაქვეყნა. NBA-ში 90-იან წლებში გამოჩენილმა შაკმა 2000-2002 წლებში ლოს ანჯელეს ლეიკერსთან ერთად სამჯერ ზედიზედ მოიპოვა ჩემპიონის ტიტული. ასოციაციის ისტორიაში ერთ-ერთმა საუკეთესო ცენტრმა კიდევ ერთხელ ჩემპიონობა უკვე მაიამიში თამაშისას შეძლო - 2006 წელს...
"შაკილი მხოლოდ NBA-ს ისტორიაში ერთ-ერთი საუკეთესო ცენტრი არ არის, ის ასევე წარმატებული ბიზნესმენი, მსახიობი და DJ-ია, რომლის დისკებიც უსწრაფესად იყიდება", - წერს ჟურნალი.
"მუსიკა ყოველთვის სისხლში მქონდა, 80-იანი წლებიდან ვცდილობდი, წარმატებული DJ ვყოფილიყავი", - ამბობს შაკი, რომელიც ყველაფერთან ერთად, TNT-ზე NBA-ს ანალიტიკოსად მუშაობს.
ვრცელ ინტერვიუში, რა თქმა უნდა, შაკილი საკალათბურთო თემასაც ვერ აუვლიდა გვერდს, მან მის კარიერაზე, კობი ბრაიანტზე და სხვა ბევრ საინტერესო საკითხზე ისაუბრა. ერთი კითხვა-პასუხი განსაკუთრებით დააინტერესებს კალათბურთის ქართველ გულშემატკივრებს, რადგან შაკილი ზაზა ფაჩულიას ახსენებს:
Maxim: ერთხელ დრეიმონდ გრინმა თქვა, რომ მისი საჩემპიონო უორიორსი შენს ლეიკერსს იოლად დაამარცხებდა. რას იტყოდით ამის შესახებ?
შაკილ ო'ნილი: "ძალიან მიჭირს იმის დაჯერება, რომ ასოციაციის ისტორიაში ერთ-ერთი უდიდესი მწვრთნელი, პლუს მე და კობი, სტივ კერის "ბანდასთან" ვერაფერს გავხდებოდით. კობი "იჭერს" სტეფს და დომინირებს მასზე; ფიშერი დაუდგება კლეის და გააუვნებელყოფს მას; ფოქსი დრეიმონდს პირველივე ნახევარში "აკიდებს" 6 ფოლს; ჰორასი თავისებურად მიუდგება კეი დისთან ბრძოლას (მაგრამ ვაღიაროთ, კეი დი მხეცია); დაბოლოს, მე შევახსენებ ფაჩულიას, რატომ ვარ "დიდების დარბაზში" მე და არა ის."
შაკილ ო'ნილი ახსენებს თანაგუნდელებს 2000-2002 წლების ლეიკერსიდან: კობი ბრაიანტს, დერეკ ფიშერს, რიკ ფოქსსა და ჰორას გრანტს. დრეიმონდის გოლდენ სტეიტის ხუთეული კი ასეთი იყო: სტეფ კარი, კლეი ტომპსონი, კევინ დურანტი, გრინი და ზაზა ფაჩულია.
კომენტარები