Thumbnail

ევროპის ვიცე-ჩემპიონი ქართველი მოჭიდავე ჯგუფური ძალადობის ბრალდებით დააკავეს

დათო მანჯავიძე პროფილის ფოტო
დათო მანჯავიძე
  • იური ლომაძემ ვერცხლის მედალი 2020 წლის ევროპის ჩემპიონატზე მოიპოვა
  • საქართველოს ნაკრების წევრთან ერთად, პოლიციამ კიდევ 4 პიროვნება დააპატიმრა

პოლიციამ თავისუფლების უკანონო აღკვეთისა და ჯგუფური ძალადობის ბრალდებით 5 პირი დააკავა, რომელთა შორის საქართველოს ბერძნულ-რომაული სტილით მოჭიდავეთა ნაკრების წევრი იური ლომაძეც (72 კგ.) იმყოფება. აღნიშნულთან დაკავშირებით შსს შემდეგ განცხადებას ავრცელებს.

“შინაგან საქმეთა სამინისტროს აჭარისა და გურიის პოლიციის დეპარტამენტების თანამშრომლებმა, ერთობლივად ჩატარებული ოპერატიულ-სამძებრო და საგამოძიებო მოქმედებების შედეგად, ხუთი პირი: 1996 წელს დაბადებული ი.ლ., 2001 წელს დაბადებული ლ.ლ., 1996 წელს დაბადებული მ.დ., 1983 წელს დაბადებული მ.ბ და 1992 წელს დაბადებული ი.დ. მოსამართლის განჩინების საფუძველზე, ოზურგეთში დააკავეს. მათ ბრალი წინასწარი შეთანხმებით ჯგუფის მიერ თავისუფლების უკანონო აღკვეთასა და ჯგუფურად ჩადენილ ძალადობაში ედებათ. დანაშაული 2- დან 10 წლამდე ვადით თავისუფლების აღკვეთას ითვალისწინებს.

გამოძიებით დადგინდა, რომ ბრალდებულებმა 1988 წელს დაბადებულ ნ.ძ.-ს ქალაქ ბათუმში, შურისძიების მოტივით, თავისუფლება უკანონოდ აღუკვეთეს, კერძოდ, ძალის გამოყენებით ჩასვეს მ.ბ.-ს მართვის ქვეშ მყოფ ავტომობილში, წაიყვანეს ოზურგეთის მუნიციპალიტეტის სოფელ ბოხვაურში, ერთ-ერთი მოქალაქის საცხოვრებელ სახლში, სადაც ფიზიკურად გაუსწორდნენ. წინასწარი შეთანხმებით ჯგუფის მიერ თავისუფლების უკანონო აღკვეთისა და ჯგუფური ძალადობის ფაქტზე გამოძიება საქართველოს სისხლის სამართლის კოდექსის 143-ე მუხლის მესამე ნაწილის “ა“ ქვეპუნქტით და 126-ე მუხლის პირველი პრიმა ნაწილის “ბ“ ქვეპუნქტით მიმდინარეობს”.

ცნობისთვის, ლომაძე ევროპის ჩემპიონატის მოქმედი ვერცხლის პრიზიორია. წლეულს, თებერვალში იტალიის დედაქალაქ რომში გამართულ ტურნირის ფინალში მან გერმანელ ფრენკ შტაბლერთან 2:6 წააგო.

კომენტარები

ბოლო ამბები