- მსოფლიოს პროფესიულ ლიგებში დაახლოებით 80-მდე ქართველი ლეგიონერი თამაშობს
- ამ უქმეებზე ქართველ ლეგიონერთა ანგარიშზე 2 გოლი და 2 საგოლე პასია
- ვაკო გვილია ბატე-ს რიგებში ბელარუსის ჩემპიონი გახდა
თავურები
ქართული გოლები გავიდა დანიასა და ავსტრიაში. დანიურ სუპერლიგაში ბოლოსწინა ადგილზე მყოფი სილკებორგი ლიდერ ბრონდბიუს მასპინძლობდა. აუტსაიდერმა 32-ე წუთზე გახსნა ანგარიში, როცა ჩამოწოდებულს თავურით დავით სხირტლაძე დაუხვდა, მაგრამ "სილკებორგმა" ეს უპირატესობა ვერ შეინარჩუნა 1:3 წააგო, მიუხედავად იმისა, რომ მეორე ტაიმში მათე ვაწაძით გაძლიერდა.
24 წლის სხირტლაძემ ამ სეზონში სუპერლიგაში მე-3 გოლი გაიტანა. სულ სუპერლიგაში მის ანგარიშზე სილკებორგის მაისურით 10 გოლია ორ სეზონში. ამავე პირველობაზე მართალია, შინ 0:2 დამარცხდა საბა ლობჟანიძის რანდერსი სონდერისკესთან შეხვედრაში, მაგრამ ქართველი ნახევარმცველი მატჩში საუკეთესოდ დაასახელს, მან ერთხელ ბურთი ძელს გაარტყა.
ასევე ლიდერს გაუტანა თავური გიორგი ქვილითაიამ. რაპიდის ფორვარდი მეორე ტაიმში შემოვიდა და 9 წუთში ზალცბურგს შესანიშნავი გოლიც გაუტანა, შემდეგ კი ხელით გაიტანა, მაგრამ ეშმაკობას მიუხვდნენ და ყვითელი ბარათით დასაჯეს. ეს ქვილითაიას პირველი გოლია ავსტრიულ ბუნდესლიგაში ამ სეზონში (ორ სეზონში მერვე). რაპიდი 2:3 დამარცხდა.
საგოლე პასები
გია გრიგალავა ამას წინათ, ეროვნულ გუნდში დააბრუნეს. ის რუსული პრემიერლიგის ტულის არსენალში ურიგოდ ნამდვილად არ თამაშობს. ამის დასტური საგოლე პასია ტოსნოს კარში. არსენალი სტუმრად 2:3 კი დამარცხდა, მაგრამ გრიგალავამ მარცხენა ფლანგიდან კარგი ჩაწოდებით სერბ გორან ჩაუშიჩს ანგარიში გაახსნევინა.
საგოლე პასი მიითვალა პოლონურ ექსტრაკლასაში მოთამაშე ლუკა ზარანდიამაც. მისმა არკამ სანდეცია 5:0 გაანადგურა, მესამე გოლი კი ლუკას პასით გავიდა სტუმართა გუნდში.
ჩემპიონობა
ბელარუსში ბატე ზედიზედ მე-12-ედ გახდა ჩემპიონი, ხოლო მისი ნახევარმცველი ვაკო გვილია - ზედიზედ მეორედ. ერთი ესაა, რომ ხელმძღვანელობასთან უთანხმოების გამო, რომელიც მის ნაკრებში ჩამოსვლას მოჰყვა გვილიას ბატე-ში აღარ ათამაშებენ. ქართველმა ამ სეზონში 9 მატჩში 1 გოლი გაიტანა.
ფაქტები
ამ უქმეებზე 16 ლეგიონერს არ მიეცა თამაშის საშუალება
4-მა ლეგიონერმა ტრავმის გამო ვერ ითამაშა
5-მა ქართველმა ლეგიონერმა ყვითელი ბარათი მიიღო, არავინ გაუძევებიათ
სეზონი დასრულდა ბელარუსში და უზბეკეთში მოთამაშე ქართველი ლეგიონერებისთვის, ზოგან კი ზამთრის შესვენება გამოცხადდა.
კომენტარები