Thumbnail

ჭანტურიას 3 გოლი – ქართველ ხელბურთელთა გუნდმა ევროსეზონი დაასრულა

დათო მანჯავიძე პროფილის ფოტო
დათო მანჯავიძე
  • ჭანტურიას და კბილაშვილის მეტალურგი სლოვენიელებთან დამარცხდა
  • ქართველთა გუნდს მაკედონიის ჩემპიონატში მე-2 ადგილი უკავია

ქართველი ხელბურთელების რევაზ ჭანტურიასა და ირაკლი კბილაშვილის კლუბი სკოპიეს მეტალურგი ევროპის ხელბურთის ფედერაციის (EHF) თასს მესამე საკვალიფიკაციო რაუნდში გამოეთიშა.

ირაკლი კბილაშვილი

მაკედონიურ გუნდს სლოვენიურ ველენიესთან პირველი მატჩი 19:24 ჰქონდა წაგებული, შინ კი, 13:10 დაწინაურდა, თუმცა, უპირატესობის გაზრდა ვეღარ მოახერხა და საბოლოოდ, მხოლოდ ფრეს (23:23) დასჯერდა. შედეგად, ევროთასის ჯგუფურ ეტაპზე სლოვენიელები გავიდნენ.

მეტალურგის შემადგენლობაში ორივე ქართველმა ლეგიონერმა ითამაშა, ჭანტურიამ კი სტუმართა კარს 3-ჯერ შეუტია და სამივე შემთხვევაში ზუსტი იყო.

ვთქვათ ისიც, რომ მაკედონიის ჩემპიონატში მეტალურგმა 33:31 დაამარცხა სკოპიეს ვარდარის ახალგაზრდული გუნდი და 11 მატჩში 33 ქულა აქვს.

მეტალურგი მხოლოდ ქულით ჩამორჩება ლექსო წითელიშვილის ოჰრიდს, რომელიც ერთპიროვნული ლიდერია, თუმცა, ჭანტურიას და კბილაშვილის გუნდს თამაში მარაგში აქვს.

კომენტარები

ბოლო ამბები