გულშემატკივარი, რომელიც გორის დილას და თბილისის ლოკომოტივის მატჩის დროს შეუძლოდ გახდა, გარდაიცვალა. უაღრესად სამწუხარო ამბავი დღეს დადასტურდა.
გარდაცვლილი დილას გულშემატკივარი თეა ირემაძეა, რომელიც ლოკომოტივთან მატჩის დროს, მე-14 წუთზე ტრიბუნაზე ცუდად გახდა. სასწრაფო დახმარების ექიმებმა ის საავადმყოფოში გადაიყვანეს, თუმცა მისი გადარჩენა ვერ მოხერხდა.
“გუშინ დილა - ლოკომოტივის მატჩის მიმდინარეობისას უაღრესად სამწუხარო შემთხვევის მომსწრენი გავხდით. ტრიბუნაზე მყოფი გულშემატკივარი - თეა ირემაძე შეუძლოდ გახდა. მას ჯერ დახმარება ადგილზე აღმოუჩინეს, შემდეგ კი საავადმყოფოში გადაიყვანეს, თუმცა ექიმების არაერთგზის მცდელობის მიუხედავად, გარდაიცვალა,” - ვკითხულობთ გორის დილას ფეისბუქზე გამოქვეყნებულ პოსტში, - “საფეხბურთო კლუბი გორის დილა დიდ მწუხარებას გამოთქვამს აღნიშნული უბედური შემთხვევის გამო და სამძიმარს უცხადებს გარდაცვლილის ოჯახსა და ახლობლებს.”
კომენტარები