Thumbnail

მსოფლიომ ნიკი ლაუდა დაკარგა - ფორმულა 1-ის ლეგენდა საკუთარ სახლში გარდაიცვალა

სანდრო მისირელი პროფილის ფოტო
სანდრო მისირელი
  • ნიკი ლაუდა ორშაბათს, ოჯახის წევრების გარემოცვაში გარდაიცვალა
  • ლეგენდარული მრბოლელი 70 წლის იყო
  • სამი კვირის წინ მას გადანერგილმა თირკმელებმა უმტყუნა

სპორტის სამყარომ ძალიან დიდი პიროვნება დაკარგა!

ფორმულა 1-ის ლეგენდა ნიკი ლაუდა გარდაიცვალა. ოჯახმა ეს ინფორმაცია სამშაბათს გამთენიისას დაადასტურა.

“უაღრესად დამწუხრებულები გაცნობებთ, რომ ჩვენი ნიკი ორშაბათს, 20 მაისს, საკუთარ სახლში, ოჯახის წევრების გარემოცვაში გარდაიცვალა. მისი განუმეორებელი სპორტული მიღწევები დაუვიწყარია. მისი პირდაპირობა, დაუღლელობა და მამაცობა ჩვენთვის სამაგალითოა. ოჯახისთვის ის ძალიან საყვარელი, მზრუნველი ქმარი, მამა და ბაბუა იყო. ნიკი ძალიან დაგვაკლდება,” - ვკითხულობთ ლაუდას ოჯახის ოფიციალურ განცხადებაში, რომელიც პორტალმა ‘die presse-მ’ გამოაქვეყნა.

1976 წელი, ავარიის შემდეგ - ნიკის სახე დაეწვა და ფილტვები და თირკმელები დაუზიანდა

ფორმულა 1-ის მსოფლიოს სამგზის ჩემპიონი (1975, 1977, 1984) კარიერის პიკში, ნიურბურგრინგზე დაუჯერებელ ავარიას გადაურჩა (1976). ნიკი ავიაკომპანიას ფლობდა, ბიზნესმენი იყო, ასევე სატელევიზიო ექსპერტი და 2012 წლიდან მერსედესის გუნდის შეფი გახლდათ. ნიკი ლაუდას სახელი ბრძოლასთან ასოცირდება - ის არასდროს ნებდებოდა. ნიკი ლაუდა მსოფლიო ბრენდია!

1976 წლის უმძიმესი ავარიის შემდეგ ლაუდას მუდმივად ჯანმრთელობის პრობლემები ჰქონდა. ავარიის დროს ლაუდამ არა მარტო სახე, არამედ ფილტვებიც დაიზიანა.

📺 ნიკი ლაუდას ავარია (1976, ნიურბურგრინგი)

მიუხედავად უმძიმესი ტრავმებისა და დამწვრობებისა, ავარიიდან 42 დღის შემდეგ ტრეკზე დაბრუნდა და ტიტულის შენარჩუნების შანსიც ჰქონდა. წლების შემდეგ, ნიკი ლაუდას ორჯერ გაუკეთეს თირკმელების ტრანსპლანტაცია.

შარშან, აგვისტოს დასაწყისში ნიკის ფილტვის ტრანსპლანტაციაც გაუკეთეს, რის შემდეგაც რეაბილიტაციას ლუცერნის კლინიკაში გადიოდა. დაახლოებით სამი კვირის წინ მის ორივე თირკმელს პრობლემები შეექმნა, რის გამოც დიალეზისთვის შვეიცარიის კერძო კლინიკაში გადაიყვანეს. მიუხედავად ამისა, ცნობა მისი გარდაცვალების შესახებ ყველასათვის მოულოდნელი იყო.

ნიკი თავის მეუღლე ბირგიტ ლაუდასთან ერთად. მათ 2008 წელს იქორწინეს. 2005 წელს ბირგიტმა ნიკისთვის თირკმელი გაიმეტა

ნიკოლაუს ანდრეას ლაუდა დიდი მებრძოლი იყო და სწორედ ამის შედეგია ის, რომ 70 წლის ასაკამდე იცოცხლა. ნიკის პირველი ქორწინებიდან ორი ვაჟი, ბირგიტ ლაუდასთან კი - 10 წლის ტყუპები ჰყავს.

გამოკითხვა

ვინ გახდება ჩემპიონი 2019 წელს?

  • ლუის ჰემილტონი
  • სებასტიან ფეტელი
  • მაქს ფერსტაპენი
  • სხვა

კომენტარები

ბოლო ამბები