დეტროიტის ფანებს ზაზა ფაჩულიას გუნდში დაბრუნება არ სურთ

• ფაჩულიას დეტროიტში დარჩენის შანსი მინიმალურია
• ფანების 84% წინააღმდეგია

დეტროიტ პისტონსისთვის სეზონი დასრულებულია. ჩვენ უკვე შემოგთავაზეთ ჟურნალ Forbes-ისეული შეფასება. გამოცემამ ზაზა ფაჩულიას სეზონი C- კლასით აღნიშნა. 

ახლა ვნახოთ, რა აზრის არიან დეტროიტ პისტონსის ფანები. პისტონსის ფანსაიტმა Detroit Bad Boys-მა ყოველ კალათბურთელზე მოაწყო გამოკითხვა, სურთ თუ არა მათ მოთამაშის მომდევნო სეზონშიც შენარჩუნება.

ზაზა ფაჩულია

სტატისტიკა: 3.9 ქულა, 3.9 მოხსნა

მიზეზი, რატომ უნდა დარჩეს: გამოცდილი კალათბურთელი, რომელიც მუდამ აძლევდა რჩევებს ახალგაზრდა თანაგუნდელებს. მასში მხოლოდ ვეტერანის მინიმუმია გადახდილი. ქმნიდა საჭირო სიღრმეს ცენტრის პოზიციაზე დეტროიტის შემადგენლობაში.

მიზეზი, რატომ უნდა წავიდეს: მისი შეცვლა იოლად შეიძლება მეტი შემტევი პოტენციალის მქონე კალათბურთელით. 

დასკვნა: პისტონსში დაბრუნება არ არის მოსალოდნელი.

რაც შეეხება გამოკითხვას, ფანების 16% ზაზას დაბრუნების მომხრეა, ხოლო 84% მიიჩნევს, რომ ის უნდა წავიდეს. კიდევ უფრო ცოტას სურს ცენტრ ჯონ ლუერის შენარჩუნება - 8%-ს. ანდრე დრამონდის დარჩენა 67%-ს სურს, ხოლო 33% სასტარტო ცენტრის წასვლის მომხრეა. 

ლიდერი ბლეიკ გრიფინის შემთხვევაში (რომელმაც წუხელ მუხლის ოპერაცია გაიკეთა) ასეა: 91% დარჩენის მომხრეა, 9 - წასვლის.