- სეტონ ჰოლი 90:75 ჯორჯთაუნი
- სანდრო მამუკელაშვილი - 11 ქულა, 8 მოხსნა
სანდრო მამუკელაშვილის სეტონ ჰოლმა ნიუარკში ჯორჯთაუნს უმასპინძლა და 90:75 დაამარცხა. ამ შეხვედრაში შესანიშნავად ითამაშა ქართველმა ფორვარდმა - ის სასტარტო ხუთეულში იყო და 31 წუთში თითქმის ორმაგი დუბლი მიითვალა - 11 ქულა და 8 მოხსნა.
აღსანიშნავია, რომ სანდროს ყველა ნასროლი კალათში წავიდა - 3-დან 3 სამქულიანი, და 1 ორქულიანი. 8 მოხსნა კი მატჩში საუკეთესო შედეგია. ამის გარდა მამუკელაშვილმა 4 ასისტი და 2 ბლოკი მიითვალა, ბურთი კი ერთადერთხელ დაკარგა. გუნდში საუკეთესო მაილს პაუელი იყო 30 ქულით.
სეტონ ჰოლს 15 მოგება და 9 მარცხი აქვს, აქედან Big East-ის კონფერენციაში 6-6. ქართველის გუნდი სენტ ჯონსთან ერთად საზიარო მესამე ადგილზეა. app.com-მა ტრადიციულად, 5 მიზეზი ჩამოთვალა, თუ რატომ იმარჯვა სეტონ ჰოლმა - მეორე მიზეზი კი მამუკელაშვილის კარგი თამაშია.
"ჯორჯთაუნის კალათბურთელების სიმაღლე მამუკელაშვილისგან კარგ თამაშს მოითხოვდა და ქართველმაც გაამართლა იმედები. არადა, მანამდე ზედიზედ 4 არც ისე შთამბეჭდავი მატჩი ჰქონდა. მან 11 ქულა, 8 მოხსნა და 4 ასისტი მიითვალა, სამივე სამქულიანი ჩააგდო და დიდი მუშაობა გასწია გოვენის (20 ქულა, 6 მოხსნა) გასანეიტრალებლად", - წერს საიტი.
"ბრძოლისუნარიანობა გამოვავლინე. ამ თამაშში მინდოდა ყველასთვის დამემტკიცებინა, რომ ლიგის საუკეთესო "მაღლებთან" თანასწორად თამაში შემიძლია. თამაშის წინ ძმამ მითხრა, რომ რაც უნდა მომხდარიყო ნეგატიურად არ მეფიქრა - ხანდახან ვიცი ხოლმე, როცა არ მიმდის სროლა, ეს აზრი აღარ მასვენებს ხოლმე, რაც თამაშში ხელს მიშლის", - განაცხადა ქართველმა ფორვარდმა.
მამუკელაშვილის სლემი
"ერთ ეპიზოდში გოვენმა მამუკელაშვილის წინააღმდეგობა არად ჩააგდო და ბურთი ეფექტურად ჩატენა, თუმცა ამას სანდრომ ეფექტური შესვლით და Windmill-ით უპასუხა, რამაც ფანები გააგიჟა - "მა - მუ, მა - მუ", ისმოდა ტრიბუნაზე", - წერს app.com.
4 ასისტი სანდრო მამუკელაშვილისთვის კარიერის საუკეთესო შედეგის გამეორებაა.
მამუკელაშვილი თანაგუნდელებმაც შეაქეს - "სანდრო კარგი მოთამაშეა, ცუდი თამაშები ყველას გვაქვს", - თქვა ნზეიმ, რომელმაც სეტონ ჰოლს 18 ქულა შესძინა - "მწვრთნელი მას მუდამ უმეორებს, რომ ლიგაში ერთ-ერთი საუკეთესო მსროლელია და ეჭვი ნუ გაუჩნდება, მტკიცედ ესროლოს. ამან კარგად იმოქმედა სანდროზე და მერე ყველამ ვნახეთ, რა შეუძლია მას". სეტონ ჰოლი 17 თებერვალს კრაიტონს შეხვდება.
კომენტარები