- ტოკიოში ბაშოს მეორე დღის ორთაბრძოლები გაიმართა.
- ლევან გორგაძემ მეორე ორთაბრძოლაც მოიგო - არავაში დოჰიოდან გაიყვანა.
- მეორე დივიზიონში კვლავ დამარცხდა თეიმურაზ ჯუღელი.
2018 წლის პირველ სუპერტურნირზე, ჰაცუ ბაშოზე წარმატებული სტარტი აქვს მე-3 მაეგაშირა ტოჩინოშინს (ლევან გორგაძე).
ქართველმა სუმოისტმა ზედიზედ მეორე მეტოქე დაამარცხა - შოდაის მერე მე-4 მაეგაშირა არავაშიც დაამარცხა. გამარჯვებისთვის ლევან გორგაძემ კვლავ იორიკირის ილეთი გამოიყენა.
ლევან გორგაძეს 2-0 ბალანსი აქვს და ახლა მე-5 მაეგაშირა ოკინოუმის ხვდება, ვისთანაც ურთიერთშეხვედრებში 6:5-ს იგებს.
პირველი დღისგან განსხვავებით, დღეს სამივე დიდმა ჩემპიონმა მოიგო - ჰაკუჰომ, კაკურიუმ და კისენოსატომ საკუთარი ორთაბრძოლები გამარჯვებით დაასრულეს.
მეორე დივიზიონ ძურიოში მოასპარეზე გაგამარუ (თეიმურაზ ჯუღელი) კვლავ დამარცხდა. დივიზიონის მე-5 ნომერმა ამჯერად, ჩიონოოსთან შიტატენაგეს ილეთით დათმო.
გაგამარუს მომდევნო მეტოქე მე-7 ნომერი სადანოუმია.
კომენტარები